Caminandu sulu sulu
ppé le strate, rripa u muru,
sentu lentu, te luntanu,
‘nu sunare te mandulinu,

te addhu vene? ‘mpizzu a ricchia.
‘Nc’è sattata ‘ntra na nicchia,
la canuscu, éte a Vata!
Ppè cci gghete sta sunata?

C’eri tristu te vagnone
‘nanzi a porta a tutte l’ore,
Fiju meu lu Natale staci vene
cu nde porta ogni bene.

Quantu tiempu, sorta mia,
ca a Caddhipuli nù bania,
m’era puru rascurdatu…
…quanti amici aggiu lassatu!

Tratiziuni, forti ‘nduri
ca te venene li tuluri
ci gghè beddhu ‘stu paese
ca te cangia ogni mese,

e ppé cinca stae te fore
intra l’occhi a tutte l’ore
tene ‘mpressu e lluminatu
lu Bambinu ‘mpena natu.

‘Ncè ddha nenia te Pasturale
ca te nnazzaca comu ù mare
intra ll’anima te trase
te colora tutte ‘e case.

Cci sta ‘ndora te taraddhi,
cartaddhate e scajozzi
ma nù potene mancare
amaretti e purstraddhuzzi.

Picca giurni aggiu te stare
scusciatatu ‘mienzu mare
me la cuardu intra e fore
me la portu intra lu core.

Stae intra la crutta lu Bambinu
e chiangendu lu sentu vicinu,
sta me tice piu piu…
…nù te curare, fazza Diu.