Caddhipuli

Nu se sape ‘ncora ci tave generatu:
ci tice li Messapi, li Creci, li Romani;
mò ‘be ticu jeu propriu cince è statu
senza crititi ‘chiui a machi o a pacani.

Quando lu Patreternu fice lu Creatu
e mentru sistemava dhu casinu,
nu ‘ziddhu te sutore ‘mprofumatu
se trasformau a nu scoju curaddhinu;

ca se ‘nturnisciau te beddhe mamme sirene,
scazzacate te soni balli e canti
ficiara ‘nzumare scorfini, cernie e murene
e se ‘ncantara tutti li navicanti.

Te ‘nanzi a tutti dhi baddhizzi,
se ‘mpizzacau lu focu te l’amore:
nascita l’angialiddhi cu li capiddhi rizzi,
ca erene beddhi te facce e beddhi te core.

Kalèpolis li Creci te chiamara,
paese beddhu è lu significatu,
“baddhizzu ca ‘darlampi comu na perna rara”
Caddhipuli, poi, si statu battezzatu.



Cci me piace quistu Mare

Cci me piace quistu Mare
quando face Tramontana:
aria frisca e ca te sana!

Cci me piace quistu Mare
quando tira lu Maestrale:
sentu tuttu tremolare!

Cci me piace quistu Mare
quando scinde lu Punente:
tiempu bonu, sole ardente!
Cci me piace quistu Mare
quando tira lu Labici:
puru se “mai bene fici”!

Cci me piace quistu Mare
quando face lu Sciaroccu:
mmana mia ci va me toccu!

Cci me piace quistu Mare
quando scinde lu Crecale:
friscu e sole sa manare!

Cci me piace quistu Mare
quando face Tempurale:
tandu sì ca l’a cuardare!

Cci me piace quistu Mare
quando Arbata liscia face:
è cristallu e tanta pace!

Osci và me menu a Mare,
nu se pote cchiui spattare:
me ddafriscu capu e piettu,
nu me fitu cchiui cu spettu!



Caddhipuli spregiatu

Nu ‘tane mai panzatu,
‘cu trovane lu fossatu
e ‘cu lu Castieddhu scusu
te dhu mostru te Marcatu.

Cari tecnici comunali
ciarcati te manare a nterra
le toi  ali e  ‘cu giustati
sulu lu frontone.

Parcè tice sempre lu Giuncatu:
‘ca jeu nu ‘be toccu
basta ca manati ‘nterra
l’ala te sciaroccu.

E poi vititi ca tuttu se sana
basta ca manati mprima ‘nterra
puru l’addha ala te tramuntana’.

Caru sinducu Venneri,
nui tutti timu vutatu
parciò cerca minti manu
a ddhu mostru te lu Marcatu.

‘Pe nui Caddhipulini
lu centru storicu  ‘a essere rispettatu
cu ddhu beddhu Castieddhu nosciu
tuttu scupertu e isulatu.